أنا و سلــــوى ..

انا و سلوى



الحب مرضى ودائي ..... وده فطرة و شئ بدائي
لا هو حاجة مخترعها ....ولا شئ جايبه بذكائي
اخترته طريق ومنهج .... وانأ عيل فى ابتدائي


قالولى يا واد هتنهج ....انا قلت جواب نهائي


أول حكاياتي سلوى....بنوتة فى رابعة تالت


ماخادتش فى ايدى غلوه ....يادوب رمشين ومالت


كنت أحب اكتب حروفنا جنبهم قلب وسهوم


مابانتش يوم من غير ماشوفها ... وابات شهور من غير حموم


وأما تهف عليا وأذاكر يجى الصبح بقدرة قادر


ألقى واجب الإنجليزي جوة كراسة العلوم


كان أخوها طويل وجته...ويفصل منى ستة


انا أشوفه جاى معاها... اتدارى فى اى حته


مهو حد فقعني بومبة ... وعرًِِف سبع البرومبة


وأكيد لو مرة شافني ....هيكون على أيده دفني


وفى يوم بعت لي واحد ...رمى كلمة عليا وراح


قال لي اللي أنت عارفه ...عايزك بعد المرواح


وأما يا دوب خطيت الباب... لسه ببص لقيت سى هباب


هي ثواني لقيته مقرب ...جايلى ولامم ست كلاب


قلت صحابي هيبقوا معايا ...نهجم مرة واحدة عليهم


واما وصلت ببص ورايا ...مشفتش غير عفار رجليهم


اتحلق لى سعتها حلقة... واتخبطت يوميها علقة


الملخص والنتيجة ...كل حتة فى وشي زرقا


تانى يوم لقيتها جاية ...ماشية بتقرب عليا


وبهدوء على ودنى مالت...وبرزانة وعقل قالت


لا الكلام ممكن يخفف او يهون اى بلوة


بس جاية وحابة اقولك هو مين فينا اللى سلوى ؟!!!

                                                     من دوشة الدوشجى ...: كريــــــــم ..