اسمــك ايــة ؟؟ ... تفاهــه !!

نزلت وسط البلد لانى بحس إن مصر بكل تناقضاتها موجودة هناك .. دخلت المكتبات سالت المثقفين وأصحاب الياقات البيضاء ، لقيتهم مش شايفين اننا شعب تافه بس مش عارفين نرتب اولويتنا !!!!

((عشان كده تلاقينا زعلانين على ماتش كورة ,أو كليب مش حلو وفى نفس الوقت ولا بيفرق معانا دستور ولا حتى سياسة والحكومة تعمل ما تعمل بس ملناش دعوة ! وكمان بنحول نهرب من مشاكلنا ومش عارفين نرتب أولويتنا صح))


وواحد تانى قال :



(( أحنا مش لاقين هدف فى حياتنا , بنتعلم ليه ؟ وبنعيش ليه ؟))


يا سلام على التناقض!! .


ولما أتكلمت مع الشباب اللى زيي وزيك كانوا اكتر ناس شيفين إن المصريين تافهين وسطحيين و قالوا ........(( الشاب اللى ينزل بنطلونه وشغال بالبلوتوث يبعت اغانى وصور يبقى تافه والبنات تافهين جدا جدا , كل تفكيرهم محصور في الماكياج والموضة والوان السنة دى ايه !!)) ... على فكرة ده رأى بنت و امورة كمان......وده راى عاجبنى جدا ...


(( الدراسة تافهة لأنها بتعتمد على الحفظ والتلقين مش بتقدم حاجة مفيده , والإعلام بكل اللى بيقدمه تافه وغلس , ومحدش بقى عنده هدف يحققه و حتى لو عنده على ما يوصله هيكون نسيه وضاع منه فى الطريق !!))


ولما سالنا الناس البسيطة زى عم احمد بياع التى التيشرتات على الرصيف ..قال :


(( جايين تكلمونا عن التفاهة , احنا ناس معندناش وقت للتفاهة , وكل همنا نربى ولدنا ولو سالتونا عن التوريث والدستور هقولكم الاقى رغيف العيش الاول وبعدين افكر فى السياسة ))


أتجمع علينا ناس كتير , وقفوا يتفرجوا وكل واحد عايز يقول رأيه وبمجرد ما ادناهم الفرصة لقينا سيل من الكلام بيحصرنا


((مش عايزين قانون طوارئ ودم خالد مش هيروح فى الارض))


((البطالة وارتفاع الاسعار هما سبب البلاوى اللى احنا فيها دى ))


((المشكلة مش بس فى الشباب , انا بشوف رجالة فوق ال 60 وقفين يعكسوا البنات على النواصى ))


((التفاهة دى ملهاش دعوة بمستوى .... ممكن صنايعى يبقى محترم اكتر من ابن الاكابر ))


حاولنا نهاديهم و نقنعهم ان لسه فى امل ولازم نبدأ بنفسنا عشان نتغير...


كان رد واحد منهم لطيف قوى ((انتم الظاهر كده حزب وطني و محفظنكم تمام ))


ولما حولنا نفهمهم اننا زينا زيهم ومش تبع حزب ولا حاجة وجايين عشان ننقل كلامهم .....كان رده المرة دى ألطف وألطف...:
 ((انا عارف انكم لا هتقدموا ولا هتاخروا انا بس بفضفض من غيظى عشان ارتاح شوية , عموما ربنا يوافقكم و ينجحلكم المقاصد))..


لما خلصنا كلام مع الناس الطيبة دى حسيت رغم الواقع المرير بارتياح شديد ..لأن ظنى فى الشعب المصري طلع صح,واذا كان اى شعب فى العالم تافه يبقى مش الشعب المصري , واذا كنا بنضحك فى اى ازمة شديده دة عشان نخبى الم أشد , واذا كان الراجل بيفكر فى اسرته الاول , فده عشان هو انسان مسئول ومبيحبش يقصر .............

و أكييييد لما هيتسأل اسمك ايه ؟؟ .. مش هيقول تفاهـــه ...

"ايها الشعب المصرى الهمام كان الله فى عونك"..

عمل الدوشة دى كلهــا .. الدوشجى :

                                          كريــــــم .